تعرف إيه عن "اليزيدية" و"الصابئة" و"الزرادشتية" و"البوذية" و"الهندوسية" و"المجوسية" و"السيخية" و"الكونفشيوسية"... وغيرها وغيرها من الديانات المختلفة؟ طيب بلاش دول، تعرف إيه عن الإسلام والمسيحية واليهودية وهم من الديانات السماوية؟
سيبنا من كل ده، وركّز معانا.. لو كنت مسلم، تعرف إيه عن الشيعي أو السني أو البهائي أو الدرزي أو القرآني أو... أو...
ولو كنت مسيحي إيه اللي تعرفه عن الكاثوليكي أو البروتوستانتي أو الأرثوذكسي أو المورموني أو اللوثري أو الإنجيلي أو... أو...
مش مهم ديانتك إيه المهم تعرف إيه عن الآخر؛ باختصار اللي ديانته غير ديانتك؟!!
فكّرت تقرأ عنه؟!!
فكّرت تفتح كتابه المقدّس، وتشوف بيقول إيه أو مكتوب فيه إيه؟!!
فكّرت تعرف المنتسب للدين ده بيؤمن بإيه؟ بيفكر إزاي؟! دينه بيحلّل إيه ويحرّم إيه؟!
تلاقيك اتصدمت لما شُفت الكلام ده، ويمكن كمان اتهمتنا بالكفر والزندقة و... و... و...
سيبك من الاتهامات دلوقتي، وتعالَ نتكلم بالعقل..
إيه اللي مانعك من إنك تقرأ في الديانات المختلفة عن دينك وتعرف عنها، وعن أصحابها؟!
تعالَ نحاول نساعد بعض في الإجابة على السؤال ده..
أكيد مش واثق من نفسك ومن إيمانك بعقيدتك؟
الخوف هو أول سبب بيخلي كتير مننا مش بيقرأوا عن ديانات الغير، يعني من الآخِر بتخاف لو قرأت عن دين تاني إنك تشكّ في دينك.. مرة تانية تعالَ نتكلم بالعقل..
لو إنت واثق بجد وبمعنى الكلمة في مدى تمسُّكك بعقيدتك ومدى قوتها مش هتخاف أبداً.. إنت بتخاف لأنك منتمي لدينك ده بحكم بطاقتك الشخصية، وإنك اتولدت لقيت نفسك من أتباع الدين ده..
وبرده خُفت إنك تقرأ حتى عن دينك وتستكشفه بنفسك وتؤمن بيه عن اقتناع، ونتيجة لـ -خلينا نقول- "جهلك بدينك اللي إنت عليه" بقيت خايف تقرأ أي كلمة في دين تاني لأحسن تشك في دينك.
تعالَ معانا كده نبص حوالينا، عارف بره بيعملوا إيه؟!! عندهم منهج لدراسة الديانات المقارنة، يعني الدكتور في المنهج ده بيدرِس ويدَرِّس الإسلام والمسيحية واليهودية وغيرهم كتييير من الديانات المختلفة، وبيحاول يستكشف الآخر المختلف عنه دينيّاً، ويقارن ما بين دينه والديانات التانية بدون قلق أو خوف، عارف ليه؟؟؟
لأنه فاهم مش حافظ، وعارف دينه كويس، وواثق منه ومن تمسّكه بيه
فكرت تفتح الكتاب المقدس
خايف تكون كده بتكفُر أو غيرك يتهمك بالكفر؟!!
في الحالة دي بتحسّ إنك لو قرأت في أي دين تاني غير دينك كده تبقى كَفرت وكأنك مش مقتنع بدينك!!
مش بس كده، ده إنت كمان مرعوب لأحسن حد يشوفك أو يعرف إنك بتقرأ أو بتستكشف دين تاني ويقول عليك ناوي تسيب دينك أو تغيّر مِلّتك..
برده عارف ليه؟! لأنك بتفكّر بنفس الطريقة.
يعني تخيّل معانا كده لو إنت راكب المترو وشفت واحدة محجبة بتقرأ كتاب عن المسيحية مثلاً، ومركّزة أوي فيه هتقول عليها إيه؟!!
أكيد هتستنكر ده، وتتهمها بالكفر، أو تحرّم اللي هي بتعمله على الأقل، وعشان كده أنت خايف إن غيرك يتهمك زي ما أنت كنت هتتهمها.
"كلهم كُفّار رايحين النار وأنا الناجي الوحيد"
لو إنت من أصحاب المبدأ ده؛ فأكيد أنت مش بس مش هتقرأ وتعرف عن الديانات الأخرى وأصحابها، لأ.. ده إنت مش هتتعامل مع أصحاب الديانات دي من الأساس..
وهتنظر ليهم بنظرة استعلاء على إنك أكتر واحد فيهم "ملَك الحقيقة" وإنت بس اللي هتدخل الجنة وهما كلهم مصيرهم النار.
وأبسط شيء ممكن تقوله: ده "علم لا ينفع وجهل لا يضر".. وإن "لكم دينكم ولي دينِ".
لو إنت من أنصار الرأي ده، جاوب علينا وقل لنا إيه المانع إنه يكون "لكم دينكم ولي دينِ" بس يكون ده عن معرفة وفهم عميق لدينك ودين الآخرين، مش عن جهل وترديد للأفكار السائدة من غير ما تحاول في مرة تفكّر فيها أو تتأكد من صحتها؟!
تعرف التلمود بيتكلم عن أيه؟
بيتهيأ لنا إن دي أهم الأسباب اللي بتخليك وتخلي كتير مننا يخافوا يقرأوا أو يعرفوا عن الديانات الأخرى، لكن أكيد فيه أسباب غير كده ممكن أنت تقولها لنا..
عارفين إنك ممكن تقول علينا كفّار، وتتهمنا بالزندقة، لكن إحنا ما نقصدش في الموضوع ده الخروج عن ديننا أو التبشير بديانات تانية، لكننا بنتّبع سنة رسولنا الكريم في "لكم دينكم ولي دينِ"، بس من منطلق المعرفة مش الجهل، وكذلك احترام الآخر وحرية دينه وعقيدته؛ لأن أول كلمة نزلت في القرآن الكريم كلمة "اقرأ".. يعني ربنا بيأمرنا بالمعرفة..
ودلوقتي قل لنا
إنت بقى..
بتقرأ في الديانات التانية ولا لأ؟
ولو لأ.. عندك استعداد تقرأ؟
ولو رافض الفكرة..
إيه اللي مخليك خايف ومرعوب تقرأ وتعرف عن ديانات الآخرين؟
خليك صريح معانا ومع نفسك أولاً وقل لنا رأيك
